Okta rektor- ja okta prorektorevttohas
Go áigemearri dievai lávvordaga njukčamánu 16. beaivvi de lei boahtán okta rektorevttohas ja okta prorektorevttohas:
- Laila Susanne Vars, rektorevttohas
- Ylva Jannok Nutti, prorektorevttohas
Válgastivra lea čoahkkimis ikte, njukčamánu 18. beaivvi, dohkkehan goappašat evttohusaid allaskuvlla válganjuolggadusaid vuođul.
Laila Susanne Vars - rektorevttohas
Laila Susanne Vars bargá dál fágadirektevran Norgga našuvnnalaš olmmošvuoigatvuođaásahusas. Sus lea doavttergráda juridihkas Tromssa universitehtas man oaččui 2010s. Son lea maiddái doaibman Sámedikki várrepresideantan áigodagas 2009-2013. Dasa lassin lei Gálddu direktevra ovdal go ásahus ovttastahttui Norgga našuvnnalaš olmmošvuoigatvuođaásahusain.
Vars dutkanalmmuhemiid sáhtát dáppe, Cristin nammasaš siiddus, oaidnit.
Ylva Jannok Nutti - prorektorevttohas
Ylva Jannok Nutti bargá vuosttašamanueansan Sámi allaskuvlla oahpaheaddjeoahpuin. Sus lea doavttergráda pedagogihkas ja nákkáhalai Julevu universitehtas 2011s. Son lea iežas bargguin earenoamážit beroštan sámi árbevirolaš máhtus ja matematihkkaoahpu čanastumis.
Jannok Nutti dutkanalmmuhemiid sáhtát dáppe, Cristin nammasaš siiddus, oaidnit.
Válggaid čađaheapmi
Válggat galget aŋkke čađahuvvot vaikko leage dušše okta evttohas goappáge doibmii. Válgabeaivi lea cuoŋománu 10. beaivvi, muhto sáhttá ovddalgihtii jienastit. Jienasteddjiide, nammalassi studeanttaide ja bargiide, sáddejuvvo e-boasta mas lea čujuhus man galgá čuovvut. Lea maid vejolaš ovdakántuvrras jienastit Diehtosiiddas.
Válgastivra dohkkehii seammá čoahkkimis jienastuslogu mii biddjo geahččán ládje ovdakantuvrii.
Loga eambbo rektorválggaid njuolggadusaid ja čađaheami birra dáppe.
