SÁM 317 Giellagáhtten ja teakstaoahppa

• Oahpu lágideapmi: Oahpahus sáhttá lágiduvvot sihke luohkkálatnja- ja neahttaoahpa-hussan.
• Oahppokoda: SÁM 317
• 10 oahppočuoggá
• Prográmmaplána
• Diibmoplána ja deaivvadanplána: TimeEdit 

Oahpu sisdoallu
Gursa čiekŋuda studeantta dáidduid iešguđegelágan teavsttaid čállimis, analyseremis, divvumis ja buorideamis. Deaddu lea erenomážit áššedeavsttain, mat gieđahallet fágalaš ja dieđalaš fáttáid. Studeanttat lohket, čállet, kommenterejit, analyserejit, divvot ja buoridit iešguđegelágan teavsttaid, ja dainna lágiin čiekŋudit iežaset áddejumi fágalaš čállimis ja dasa gullevaš teakstašlájain. Sii ohppet hálddašit fágalaš ja dieđalaš teavsttaid ráhkadussii, stiilii ja giellageavahussii guoski gáibádusaid ja vuordámušaid, ja máhttet heivehit dáid dieđuid sihke iežaset čállimii ja earáid teavsttaid buorideapmái ja divvumii.

Oahppoprográmma gullevašvuohta
Gursa gullá Sámegiela ja sámi girjjálašvuođa masterprográmma váljagurssaide.

Oahpahusgiella
Davvisámegiella lea váldooahpahusgiellan. Eará sámegielat ja suoma-, ruoŧa-, dáro- ja eaŋgalsgiella sáhttet adnojuvvot omd. guosselogaldallamiin.

Oahpahan - ja oahppanvuogit
Logaldallamat, seminárat ja iehčanas čálalaš barggut. Seminárain studeanttat buktet ovdan iežaset čálalaš bargguid ja kommenterejit eará studeanttaid ovdanbuktimiid.

Ovdal beassá eksámenii, studeanta galgá:
Gursii gullet hárjehusaid lassin golbma geatnegahtton barggu.

1) Referáhta fágalaš čállosis (guhkkodat 2–3 siiddu; álgovuolggalaš čállosa guhkkodat galgá leat 20–40 siiddu)
2) Esseija – smiehtadeaddji ja argumentatiiva čálus man nu fágalaš fáttás (guhkkodat 4–5 siiddu)
3) Giellagáhtten- dahje teakstadivvunčálus: čálalaš bargu, mii vuojulduvvá dihto giella- dahje teakstadivvungažaldagaide (guhkkodat 4–5 siiddu).
Čálalaš bargguid dárkilis fáttát sohppojuvvojit ovttas fágaoahpaheaddjiin. Gurssa áigge dollo-juvvojit seminárat, main fágaoahpaheaddji ja eará studeanttat kommenterejit čállosiid.

Eksámen
Máhppaeksámen, mas leat golbma čállosa. Árvvoštallan: Árvosátni A–F; buot barggut deattuhuvvojit seamma ollu.