Filbma buvttadeapmi: Sámi ja álgoálbmot muitalusat filmmaid bokte
Govven/Foto: Árvu/Stine Marje Vars
- Oahpu lágideapmi: Oahppu lágiduvvo oahppobáikkis Sámi allaskuvllas ja Internašunála Sámi filbmainstituhtas. Interneahtta sáhttá geavahuvvot sihke oahpahusas, bagadallamis ja sisabuktimiidda.
- Oahppokoda: JOU 181
- 10 oahppočuoggá
- Oahppoplána
- Diibmoplána ja deaivvadanplána: TimeEdit
Oahpu sisdoallu
Studeanttat galget oahppat filbmet ja ráhkadit filbmamuitalusaid.Dán oahpus studeanta váldá atnui buot filbmema teknihkaid (govvet, čuohppat ja jietnabarggu) ja ráhkada filmma vaikko guđe šáŋŋeris, man guhkkodat lea eanemusat 10 minuvtta. Studeanta galgá čájehit filmmainis ahte lea ožžon vuđolaš ipmárdusa filmma kreatiiva ja praktihkalaš bargguide, ja ahte iešheanálaččat ja ovttas eará studeanttaiguin nagoda alla fágalaš dásis čađahit ja válbmet filbmabuvttadeami mearriduvvon áigemearis.
Dán oahpus ohppet studeanttat mo filbmaárvalusas dahje ideas sáhttá bargat dassái go filbma gárvána. Sii čállet mánusiid ja ráhkadit storyboard. Ohppet geavahit kámeraid ja makkárat leat filbmenstiillat. Studeanttat maid ohppet daid ođđaseamos čuohppanrusttegiiguin bargat ja gárvet buktagiid dahje filmmaid mearriduvvon áigemearis.
Oahppoprográmma gullevašvuohta
Fága dohkkehuvvo doarjjafágan Sámi journalistihka bachelorprográmmas ja sáhttá dohkkehuvvot oassin eará bachelorprográmmain.
JOU 146 Filbmaoahppu ja dokumentára buvttadeapmi (25 oč) oahpus lea 10 oč fágalaš látnjalasvuohta JOU 181 fágain.
Oahpahusgiella
Oahpahusgielat leat davvisámegiella ja eŋgelasgiella, muhto skandináva gielat sáhttá geavahuvvot. Oahpahus eaŋgalsgillii ii dulkojuvvo. Studeanta galgá bastit lohkat eŋgelasgielat girjjálašvuođa, čuovvut ja oasálastit ságastallamiidda eŋgelasgielat logaldallamiin.
Oahpahan - ja oahppanvuogit
Studeanta galgá álgoálbmot geahčestagain hálddašit buvttadan- ja govvenplánaid čállima, govvema , visualiserema kámera bokte, čuohppama ja filmma ollislaš buvttadeami. Oahpus fállat bagadallama, árvvoštallama ja čuovvolemiid.
Gáibadusat beassat eksámenii
Studeanta galgá ráhkadit filmma buvttadanplána ja govvenplána, govvet ja editeret filmma lohkanbaji áigge. Studeanta ferte oasálastit unnimusat 80% lágiduvvon oahpahussii.
Eksámen
Eksámen lea praktihkalaš filbmabargu mainna studeanttat barget olles lohkanbajis. Filbma sáhttá leat vaikko guđe šáŋŋeris ja filmma guhkkodat lea eanemusat 10 minuhta.
Árvosánit addojit ECTS vuogádaga mielde, mas A lea buoremus árvosátni ja E lea vuolemus ceavzinárvosátni. F árvosátni mearkkaša ahte ii leat ceavzán. Muđui čujuhuvvo Sámi allaskuvlla loahpalaš árvvoštallan- ja eksámennjuolggadusaide.
Sisabeassangáibádusat
- Dábálaš sisabeassangáibádusat alitoahpahussii. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga/gymnása) dahje reálagelbbolašvuohta. Dasa lassin gáibiduvvo sámegielmáhttu.
- Ohcci galgá leat čađahan JOU 180 Sámi ja álgoálbmot muitalusat filmmaid bokte: giehtačállima álgooahppu (10 oč), dahje sus galgá leat dohkkehuvvon giehtačálus filbmii. Jus ohcci ii leat čađahan JOU 180, de bidjá giehtačállosa mielddusin ohcamii ja dat árvvoštallojuvvo Sámi allaskuvllas sisaváldima oktavuođas.
- Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.
Koordinator
