BA - Sierra kursa

SÁM 104 Davvisámegiela cealkkaoahppa

Oahpu sisdoallu
Davvisámegiela cealkkaoahppa guorahallá davvisámegiela cealkkaráhkadusa ja -mearkkašumi. Guovddážis lea cealkkaosiid čilgen, daid ráhkadusat ja mo dat laktásit oktii gihppun, cealkkan ja dajusin. Árbevirolaš skuvlaoahppogirjjiid čilgenvugiid lassin gullá dán fáddái maiddái oahpásmuvvat sámegiela ođđaset fágagirjjálašvuođa čilgenmálliide.

Oahppoprográmma gullevašvuohta
Sámegiela ja sámi girjjálašvuođa bachelorprográmma.

Oahpahusgiella
Davvisámegiella. Studeanta ferte maiddái máhttit lohkat eaŋgalasgielat fágagirjjálašvuođa.

Oahpahan - ja oahppanvuogit
Oahpahus lágiduvvo sihke logaldallamin ja semináran main vurdojuvvo ahte studeanttat oassálastet aktiivvalaččat. Sohppojuvvon bagadallandiimmuin studeanttat ja oahpaheaddji guorahallet ovttas fágalaš áššiid.

Gáibadusat beassat eksámenii
Kursii gullet vihtta geatnegahtton hárjehusbarggu. Barggut sáhttet leat dábálaš bargobihtát dahje eará čálalaš hárjehusat maid studeanta máhcaha oahpaheaddjái. Okta bargu galgá leat guhkibuš čálus mii ovdanbuktojuvvo oktasaš semináras.

Geatnegahtton barggut galget leat dohkkehuvvon ovdal go studeanta beassá eksámenii. Sámegiela ja sámi girjjálašvuođa studeanttas vurdojuvvo, ahte son čállá sámegiela giellaoahpalaččat riekta.

Eksámen
Njealji (4) diimmu oktagaslaš čálalaš eksámen. Eksámen árvvoštallojuvvo bustávvaárvosániin (A-F).

 

 

Filesize: 165 KB
Filesize: 230 KB

Oza ohppui

Sisabeassangáibádusat

  • Dábálaš sisabeassangáibádusat alitoahpahussii ja sámegielmáhttu. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga) dahje reálagelbbolašvuohta. Oppalaš lohkangelbbolašvuođa gáibádusat olgoriikka ohcciide bohtet ovdan NOKUTa GSU-listtus.
  • Sámegielmáhttu. Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.
  • Dasa lassin studeanta galgá leat čađahan SÁM 102 Davvisámegiela morfologiija ja cealkkaoahpa (10 oč) dahje vástideaddji oahpu.