Sámi allaskuvllas leat ođđa ambassadevrrat Ruošša bealde

Mannan čavčča ledje lonohallanstudeanttat boahtán Sámi allaskuvlii gitta Ruoššas, Yakutskas. Sii ledje SÁÁL–studeanttat čavččalohkanbajis ja ohppe earret eará davvisámegiela ja sámi kultuvrra birra. Eatnasiidda lei Guovdageaidnu vuosttaš deaivvadeapmi Eurohpain.

Vuosttaš beaivi Davvi-Norggas, jođus Áltái ordnet orrunlobi

Lonohallanstudeanttat leat muđui studeanttat The Arctic State Institute of Culture and Arts alitoahppoásahusas, mii lea nuortabeale Ruošša ja Sámi allaskuvlla ovttasbargoguoibmi. Sii studerejit árbevirolaš eamiálbmotkultuvrra sihke bachelor - ja mastergrádadásis.

Guovdageainnus ja SÁÁL-oahpus besse oahppat giela ja sámi árbevirolašmáhtu birra, ja leat maiddái oahpásmuvvan eará sámi nuoraiguin geat bohtet miehtá Sámis. Oahpu bokte leat sii ožžon olbmáid agibeaivái.

Sii leat maiddái doallan konsearttaža Diehtosiiddas studeanttaide ja bargiide.

Dihtet go ahte lea sullii 4500 km gaska gaskal Guovdageainnu ja sin ruovttuguovllu Yakutska?
Sidjiide lea lonohallanvásáhus leamaš earenoamáš ja miellagiddevaš go besse oahpásmuvvat eará eamiálbmogiiguin davviguovllus. Ovdal go vulge lonohallamii de sii sihke illudedje ja balle vuolgit Guovdageidnui, muhtumat eahpidedje ahte dustet go oba vuolgit ge nuppe beallái máilmmi. Sin mielas manai lonohallanáigi beare jođánit ja ledje háliidit orrut guhkit go galge. Dál áigot sii leat Sámi allaskuvlla ambassadevrat sin guovllus.