Oahpaheaddjit ovdanbuktet sámemáilmmiid Minecraft spealus
Sámi allaskuvllas lea dán oahppojagi leamašan vejolaš studeret Oahpaheaddji digitála gelbbolašvuohta ja gáiddusoahpahusa čađaheapmi-fága. Oahppu lea geasuhan oahpaheddjiid miehtá Sámi. Oahppu lea leamašan olles jagi oahppu (15oč) ja juhkojuvvon golmma modulii. Fága oasit leat leamašan Oahpaheaddji profešuvdnafágalaš digitála gelbbolašvuohta, Gáiddusoahpahusa čađaheapmi ja Geavatlaš reaiddut ja hárjehusat. Máŋimus modulas leat oahpaheaddjit beassán bargat Minecraft spealluin.
Ovttasbargu gaskal Sámi allaskuvlla, Sámi lohkanguovddáža ja Agder universitehta
Sámi allaskuvlla ja Agder Universitehtta oktasaš Minecraft-prošeavtta bokte leat leamašan oahpaheaddjit oahpaheamin Minecraft spealu geavaheami oahpahusas ja bagadallan sámi oahpaheddjiid ráhkadit iežaset máilmmiid ja geahččalit daid oahpahusas. Minecraft prošeavtta kordináhtor, universitehtalektor Line Reichelt Føreland Agder universitehtas lea Sámi allaskuvllas dan oahppojagis viiđat gieđahallan sierralagan webinarain Minecraft spealu geavaheami sámi skuvllain. Mielde leat leamašan maid Karuss ja Vigvoll skuvllaid oahpaheaddjit Kari Midtsund Nordbø ja Eirik Hodne. Sámi allaskuvlla SOA-goađi bealis Minecraft prošeavttas bargá ja kordinere vuosttašamanuensa Rauni Äärelä- Vihriälä. Lohkanguovddaš lea mielde prošeavttas maid.
- Oahpaheaddjit ledje ráhkadan máŋggabealat máilmmiid ja geavahan Minecraft spealu máŋggabealat vugiin oahpahusas. Sii leat čátnán spealu geavaheami ee. matematihkkii, sámegillii ja luonddufágaide. Oahpaheaddjit leat beassan nannet árbevirolaš máhtu ja sámegiela geavaheami ođđa arenain. Maiddái ohppiid iešráđalašvuohta, ohppiid ja oahpaheaddjiid gaskasaš gulahallama nannema leat beassán ovddidit Minecraft spealu geavaheami bokte, muitala Sámi allaskuvlla vuosttašamanueansa Rauni Äärelä-Vihriälä.
Joatkit digitála oahpuiguin
Váikko Oahpaheaddji digitála gelbbolašvuohta ja gáiddusoahpahusa čađaheapmi-fága nohká dál, de leat Sámi allaskuvllas plánemin juo boahttevaš digitála oahpuid. Maiddái Sámi allaskuvlla ja Agder universitehtta Minecraft ovttasbargu joatkašuvva ain. Bargguid vuolde lea oktasaš báiki gos gávdnojit gárvves Minecraft -máilmmit sáme oahpahussii oktan bagadusain. Jus leat sáhkki gullat eambbo dán prošeavtta birra dahje Minecraft vejolašvuođain, de váldde áinnas oktavuođa Sámi allaskuvllain, prošeavtta kordinerejeaddji Rauni Äärelä-Vihriäläi rauniav@samas.no.
