Ođđa dutkanprošeakta: Movt vásihit boazosámi nuorat rasismma
Sámi allaskuvla álggaha dál dutkanprošeavtta mas geahčadit movt nuorra sámit geain lea gullevašvuohta boazodollui, vásihit rasismma. Dutkosis čohkkejuvvo máhttu fokusjoavkku ja individuálalaš jearahallamiid bokte mas nuorra sámit gaskal 13 ja 30 jagi oassálastet. Bohtosat galget buktit eambbo máhtu movt nuorat vásihit rasismma ja konkrehta evttohusaid doaibmabijuide maiguin eastada rasismma/vaššiságaid.
- Mihá-dutkosis Nuorra sámiid psyhkalaš dearvvašvuohta (Unge samers psykiske helse) (2021) bođii ovdan ahte sámi nuorain leat iešguđetlágan muitalusat movt leat vásihan vealaheami, rasismma, givssideami ja neahttacielaheami ja vaššiságaid. Oallugat leat vásihan badjelgeahččama skuvllas, báikegottiin ja neahtas. Raporta rávvii aktiivvalaš ja systemáhtalaš barggu vai eastadit ahte sámi nuorat vásihit vealaheami ja sámevaši. Ođđa dutkanprošeavttas galgat geahčadit eambbo vásáhusaid boazosámi nuoraid gaskkas, dadjá prošeaktajođiheaddji Ketil Lenert Hansen.
Boazosámi nuorat vásihit ollu unohisvuođaid
Dutkanjoavkkus leat mielde prošeaktajođiheaddji Ketil Lenert Hansen, professor Nils Oskal, professor Anne Lindblom, vuosttašamanueansa Ylva Jannok Nutti ja vuosttašamanueansa Hadi Lile. Dutkkus čađahuvvo ovttasráđiid Norgga Boazosápmelaččaid Riikkaservviin (NBR) ja Sámi joatkkaskuvla ja boazodoalloskuvllain. Referánsajoavkkus leat mielde NBR nuoraidlávdegoddi, Norgga olmmošvuoigatvuohtaásahus, Sámi našuvnnalaš gealbobálvalus – psyhkalaš dearvvašvuođasuddjen ja gárrendilledikšu (SÁNAG) ja RomsaDál.
Sámi allaskuvla álggaha dutkanbarggu skábmamánu 22.b. 2022 ja galgá gárvvistit barggu 2023 čavčča. Dutkkus lea máksobargu Sámedikki ja Dásseárvo- ja vealahusáittardeaddji ovddas.
- Rasisma lea duođalaš servodatváttisvuohta ja boazosámi nuorat leat suojehis dilis ja šaddet vásihit ollu cielaheami ja vaššisániid. Dán prošeavtta ulbmil lea čalmmustahttit rasismma maid boazosámi nuorat vásihit ja evttohit mearrediđolaš doaibmabijuid mat eastadit rasismma ja vaššiságaid, loahpaha prošeaktajođiheaddji Ketil Lenert Hansen.
