Sámi buohccidivššároahppu ohcanládje
Háliidat go šaddat buohccidivššárin earenoamáš gelbbolašvuođain sámegielas ja sámi kultuvrras? Dál lea fas vejolaš ohcat Sámi buohccidivššárohppui. Ohcanáigemearri lea golggotmánu 16.b. 2022. Lea UiT - Norgga árktalaš universitehta mas lea fágalaš ovddasvástádus ohppui, ja danne galgá ge ohcamuš mannat universitehta ohcanwebii.
- Dát oahpu heive dutnje jus háliidat buohccidivššár oahpu váldit sámegillii, mii lea okta dain earenomášvuođain oahpus. Logaldalliin lea sámi duogáš mii addá lunddolaš ipmárdusa sámi- ja eamiálbmotkultuvrralaš beliide. Mis lea maid oadjebas biras das go buohkat leat sámegielagat ja oahpahus lea sámi birrasis, Guovdageainnus. Dáppe šaddá maid buoret čuovvuleapmi ja lágat oktavuohta gaskal oahpaheddjiid ja studeanttaid, go luohkká ii leat beare stuoris, muitala oahppokoordináhtor June Brita Eira.
Sámi buohccidivššároahppu addá dutnje dábálaš buohccidivššároahpu, seammásgo oaččut liige máhtu sámi servodatdilálašvuođain ja sámi kultuvrras vai sáhtát buoremusat dustet sámi pasieanttaid.
Mannan háve ledje olu ohccit
Sámi buohccidivššár oahpu álggahuvvui ođđajagimánu 2021 buori ohcciidloguiguin. Ohppui ledje ohccán 66 olbmo ja 13 olbmo ožžo fálaldaga álgi ohppui.
- Ohcciidlogut dieđusge muitalit ahte lea stuora beroštupmi ohppui ja báikkálaš oahppofálaldahkii lea dárbu. Muđui lea maid sámi buohccidivššáriidda stuora dárbu servvodagas ja dat dieđusge mearkkaša ahte lea buorit bargovejolašvuođat maŋŋel go leat gárven oahpu, muitala Eira.
Oahppu lea ovttasbargu gaskal Norgga árktalaš universitehtain ja Sámi allaskuvllain. Oahppoálgin lea ođđajagimánus 2023:is, ja oahpahus lágiduvvo báikkálaš čoagganemiiguin Sámi allaskuvllas, Guovdageainnus. Ohcanáigemearri lea golggotmánu 16. Beaivvi.
Váldde oktavuođa
Jus lea jearaldagat oahpu birra, de váldde oktavuođa June Brita Eirain.
E-boasta: june.b.eira@uit.no
Tlf. nr.: 414 69 715
Loga eanet oahpu birra Norgga árktalaš universitehta ruovttusiiddus.
