Oahpahus- ja dutkivirggiid virgáidanproseassat

Virgádanproseassaid birra

Váldonjuolggadus lea ahte buoremus kvalifiserejuvvon ohccái fállojuvvo virgi, jus eará láhka dahje láhkaásahus ii daja maidege eará. Árvvoštallamis deattuhuvvo oahppu, hárjáneapmi/vásáhusat ja persovnnalaš heivvolašvuohta, oktan gelbbolašvuođagáibádusaiguin mat virgealmmuhusas ovdanbohtet (gč stádabargiidlága §3). Dasa lassin bidjá Universitehta- ja allaskuvlaláhka (U/A-láhka) sierra gáibádusaid fágalaš árvvoštallamiidda.

 

Dieđalaš virggiid virgáibidjanproseassa:

Áššedovdiid árvvoštallan:

Buot fásta dutkan- ja oahpahusvirggiid virgáibidjanproseassain gáibiduvvo ahte áššedovdilávdegoddi nammaduvvo. Áššedovdilávdegotti mandáhtta lea árvvoštallat ohcciid fágalaš máhtu čielgasit daid formálalaš gáibádusaid ektui mat leat ovddiduvvon almmuhusteavsttas, ja vuoruhit vuorroortnega mielde daid ohcciid geat leat dohkálaččat. Lávdegotti árvvoštallan lea vuođđun árvalussii mii ovddiduvvo virgáibidjanorgánii, gč U/A lága § 6-3 (3).

Áššedovdilávdegoddi árvvoštallá dušše dokumentašuvnna mii lea sáddejuvvon ohcamuša mielde. Danin lea nu dehálaš ahte bijat buot mildosiid jobbnorge.no portálii go ozat. Dokumentašuvdna mii gáibiduvvo, lea:

  • CV- ja oahppoduođaštusat
  • Ollislaš publikašuvdnalistu
  • Relevántta publikašuvnnat
  • Duođaštuvvon pedagogalaš gelbbolašvuohta/ pedagogalaš máhppa
  • Eará relevántta duođaštusat, omd. bargoduođaštusat jna.

Lávdegotti árvvoštallan galgá gárvvis 3 mánu sisa maŋŋel go ožžo ohcciid materiála.

Árvvoštallan sáddejuvvo dasto ohcciide ollislaččat ja sidjiide addo 10 beaivvi áigemearri buktit cealkámuša árvvoštallamii. Jus oktage buktá cealkámuša árvvoštallamii, de addo áššedovdilávdegoddái diehtu dán birra ja oažžu vejolašvuođa kommenteret dahje rievdadit árvvoštallama. Áššedovdilávdegotti árvvoštallan ii leat almmolaš dokumeanta, almmolašvuođalága § 25 vuosttaš lađđasa vuođul, ovdal virgáibidjanlávdegoddi lea meannudan ášši. Ohcciide addo diehtu jobbnorge.no bokte, go árvvoštallan sáddejuvvo sidjiide, ahte sis lea geatnegahtton jávohisvuohta gitta ášši lea meannuduvvon virgáibidjanorgánas.

Buot ohccit oahpahan- ja dutkanvirggiide galget iežaset ohcamis duođaštit iežaset pedagogalaš vuođđogelbbolašvuođa. Ohccis leat guokte vuogi dokumenteret pedagogalaš vuođđogelbbolašvuođa:

  • Duođaštus čađahuvvon universitehta- dahje allaskuvlapedagogalaš prográmmas mii vástida unnimusat 200 diimmu (oktan kursa- /eksámenduođaštus ja oahppoplána)

dahje

  • Pedagogalaš máhppa mas lea systemáhtalaččat čohkkejuvvon dokumentašuvdna sihke relevántta kurssain ja iežas praktihkalaš oahpahusas ja bagadallamis, mii oktiibuot lea vástideaddji prográmmii namuhuvvon ovddit čuoggas.

Loga dás eambbo pedagogalaš vuođđogelbbolašvuođa ja pedagogalaš máhppa birra.

Jearahallamat, geahččalanlogaldallamat ja referánsajearahallamat Maŋŋel go áššedovdilávdegoddi lea buktán cealkámuša, de galget ohccit geat adnojuvvojit eanemus gelbbolažžan bovdejuvvot jearahallamii. Jearahallama ulbmil galgá leat čielggadit persovnnalaš dohkálašvuođa virgái, motivašuvnna ja ovdánanpotensiála daid iešguđet bargodoaimmaid hárrái mat gullet virgái. Ohccit sáhttet maiddái bovdejuvvot doallat geahččalanlogaldallama/geahččalanoahpaheami/ geahččalančájálmasa. Sámi allaskuvla váldá oktavuođa referánssaiguin maid kandidáhtta lea almmuhan ohcama bokte.

Go lagamus hoavda lea buktán iežas árvalusa/evttohusa virgáibidjamii, de loktejuvvo ášši virgáibidjananorgánii, FVO:ii. Dás gávnnat dieđuid lávdegotti birra.