mai 05. beaivi 2017
Sámi oahpaheaddji masteroahput besset álggahuvvot
Sámi allaskuvla beassá álggahit oahpaheaddjioahpuid masterprográmmaid čavčča rájes. NOKUT (Nasjonalt organ for kvalitet i utdanninga) lea dál ovddalgihtii dohkkehan Sámi allaskuvlla viđa jagi oahpaheaddjeoahpuid masteriid vissis eavttuiguin.
- Dát lea máilmmi somás ja dehálaš sáhka olles Sápmái. Mun lean hui movttet go min bargit nu čehpet ja gierdevaččat leat lihkostuvvan dáinna proseassain. Dál sávan beare ahte oažžut eanemus lági mielde ohcciid. Sápmi dárbbaša ođđa oahppan oahpaheddjiid, rektor Gunvor Guttorm dadjá.
Gunvor Guttorm, rektor, Seija Risten Somby, dekána ja Ellen Inga Turi, dutkan- ja oahppohoavda. Govven: Máhtte Sikku Valio
Sámi allaskuvla lea dássážii fállan njeallje jagi oahpaheaddjeoahpuid. Muhto dál gáibiduvvo viđa jagi masteroahppu, man NOKUT ferte dohkkehit ovdal go oahput sáhttet álggahuvvot. NOKUT lea dál dohkkehan ahte Sámi allaskuvla beassá daid álggahit, muhto bidjá vissis eavttuid. Eaktuduvvo earret eará ahte Sámi allaskuvla oažžu sadjái professor II virggehasaid matematihkas, suomagielas ja ruoŧagielas ovdalgo formálalaččat addá loahpalaš dohkkeheami. Sámi allaskuvla lea soahpamin fágaolbmuiguin geat sáhttet váldit namuhuvvon virggiid ja árvvoštallá ahte sii bohtet sadjái farggamusat.
Dan geažil Sámi allaskuvla bidjá johtui sámi oahpaheaddjeoahpu 1.-7. ceahki mastergráda ja 5.-10. ceahki mastergráda 2017 čavčča rájis. Eaktuduvvo gal vel ahte leat doarvái ohccit geat devdet unnimusgáibádusaid.
Oahput leat ain ohcan ládje Sámi allaskuvlla báikkálaš sisaváldima bokte gitta miessemánu 31. beaivvi rádjái.
Oktavuođadieđut:
- Seija Risten Somby, dekána
- Gunvor Guttorm, rektor
